मुंबई दि. १३: आगामी लोकसभा निवडणुका जाहीर होण्याआधी प्रत्येक मुंबईकराचा मताधिकार सुनिश्चित व्हावा या हेतूने, मुंबई शहर आणि उपनगर या जिल्ह्यांमध्ये नवमतदार विशेष मोहिम राबविली जात आहे. या मोहिमेला अधिक गती देण्यासाठी मुंबई महापालिकेचे आयुक्त इक्बाल सिंग चहल यांच्या अध्यक्षतेखाली आढावा बैठक घेण्यात आली.
या बैठकीस मुंबई शहर जिल्हाधिकारी तथा जिल्हा निवडणूक अधिकारी संजय यादव, बेस्टचे व्यवस्थापकीय संचालक विजय सिंघल, स्वीप नोडल ऑफिसर फरोग मुकादम, विशेष कार्य अधिकारी डॅा. सुभाष दळवी, मुख्य निवडणूक कार्यालय स्वीप समन्वयक, पल्लवी जाधव, मुंबई महानगरपालिकेचे सर्व संबंधित विभागांचे वरिष्ठ अधिकारी उपस्थित होते.
बैठकीत १८ वर्षावरील नागरीकांसाठी मतदार नोंदणीची विशेष मोहिम राबविण्यात येत आहे. तसेच दिव्यांग मतदारांपर्यंत पोहोचण्यासाठी मुंबई महापालिकेकडे असलेल्या उपलब्ध माहितीच्या आधारे या मतदारांपर्यंत पोहचण्याचे, अंथरुणावर खिळून असलेल्या नागरिकांची आरोग्य विभागाकडील उपलब्ध माहिती तपासून मतदार यादीत यादीतील नावांची खात्री करून घेणे, मुंबई शहर आणि उपनगर जिल्ह्यांतर्गत येणाऱ्या मुंबई विद्यापीठ, एसएनडीटी महिला विद्यापीठ, आरोग्य विद्यापीठ आणि होमी भाभा स्टेट विद्यापीठ, यांच्यासह मुंबई शहर आणि उपनगर भागातील खाजगी विद्यापीठांच्या कुलगुरुंशी समन्वय साधून नवमतदारांच्या नोंदणी वाढविण्यासाठी विशेष नियोजन करण्याबाबत सविस्तर चर्चा करण्यात आली.
नवमतदार नोदणी विशेष मोहिमेत मुंबई महानगरपालिका सर्वतोपरी सहकार्य करेल – आयुक्त डॉ. इकबाल सिंह चहल
बृहन्मुंबई महानगर पालिकेशी संलग्न सार्वजनिक आरोग्य विभागाच्या आरोग्य सेविका, अशा सेविका, महिला स्वयंसहाय्यता गट, महिला बचत गट, स्वच्छ मुंबई प्रबोधन अभियान वस्ती पातळीवरील कार्यरत संस्था व त्यांचे स्वयंसेवक आणि नागरी सुविधा केंद्रांच्या माध्यमातून नवमतदार नोदणी विशेष मोहिमेत मुंबई महापालिका सर्वतोपरी सहकार्य करणार, असे आश्वासन आयुक्त डॉ. इकबाल सिंह चहल यांनी दिले. तसेच सर्व संबंधितांनी निवडणुकीच्या कामाला अधिक प्राधान्य द्यावे, असे निर्देशही बैठकीत दिले.
जिल्हाधिकारी तथा जिल्हा निवडणूक अधिकारी संजय यादव यांनी मतदार नोंदणी करुन सक्षम लोकशाहीमध्ये सहभागी होण्यासाठी आगामी लोकसभा निवडणुकीसाठी मतदार यादीमध्ये नाव नोंदविण्याची संधी अजूनही आहे, असे सांगून मतदार यादीत आपले नाव तपासून घ्यावे, आणि आपले नाव नसेल तर मतदार नोंदणीसाठी voters.eci.gov.in / Voter Helpline Mobile App / मतदार मदत क्रमांक 1800221950 यावर संपर्क करावा असे आवाहनही यावेळी त्यांनी केले.
०००