सातारा दि. ११ : सुपने मंडळातील विविध प्रलंबित आणि प्रस्तावित विकासकामांचा सविस्तर आढावा पालकमंत्री शंभूराज देसाई यांनी घेतला. सुपने मंडळातील नागरी सुविधा, रस्ते, पाणीपुरवठा आणि इतर पायाभूत सुविधांच्या कामांना गती देण्याचे आदेश दिले. कराड येथील विश्रामगृहात झालेल्या या आढावा बैठकीला जिल्हाधिकारी संतोष पाटील, ग्रामीण विकास यंत्रणेचे प्रकल्प संचालक विश्वास सिद, प्रांताधिकारी अतुल म्हेत्रे, तहसीलदार कल्पना ढवळे, जिल्हा नियोजन अधिकारी यशवंत थोरात यांच्यासह विविध शासकीय विभागांचे वरिष्ठ अधिकारी उपस्थित होते.
पालकमंत्री श्री. देसाई यांनी सुपने मंडळातील सुरू असलेल्या विविध विकासकामांच्या सद्यस्थितीची माहिती घेतली. ग्रामीण भागातील नागरिकांना मूलभूत सुविधा वेळेत मिळणे गरजेचे असल्याचे सांगत, सर्व कामे दर्जात्मक आणि ठरवलेल्या मुदतीत पूर्ण करावीत, अशा सूचना त्यांनी दिल्या. तसेच ज्या कामांमध्ये काही अडचणी असतील त्या प्राधान्याने सोडवून कामांचा मार्ग सुकर करावा, असेही त्यांनी सांगितले. प्रशासनाने सर्वसामान्यांच्या प्रश्नांकडे बारकाईने लक्ष देऊन प्रलंबित कामे लवकरात लवकर मार्गी लावावीत, असे आदेशही पालकमंत्री श्री. देसाई यांनी दिले.
बैठकीच्या प्रारंभी उपस्थित अधिकाऱ्यांनी आपापल्या विभागांशी संबंधित विकासकामांचा अहवाल सादर केला.
0000
