मुंबई, दि. २ : सह्याद्रीच्या गडकिल्ल्यांपासून ते आंतरराष्ट्रीय पर्वतरांगांपर्यंत आपल्या जिद्दीची पताका फडकावणाऱ्या ११ वर्षीय बाल गिर्यारोहक ग्रिहीथा विचारे हिने अल्पवयातच शंभरहून अधिक गड-किल्ले आणि पर्वतशिखरे सर करून राज्यातील मुलींसमोर प्रेरणेचा नवा आदर्श उभा केला आहे. तिच्या या उल्लेखनीय कामगिरीबद्दल महिला व बालविकास मंत्री आदिती तटकरे यांनी मंत्रालयात तिचा सत्कार करून गौरव केला.
मंत्रालयात आज ग्रिहीथाशी संवाद साधताना मंत्री तटकरे म्हणाल्या, मुलीच्या जन्माचे महत्त्व आणि तिच्या क्षमतांची उंची तुझ्याकडे पाहून समजते. चिमुकल्या वयात यशाची अनेक शिखरे पार करून तू राज्यातील आणि देशातील मुलींसाठी प्रेरणास्थान ठरली आहेस. ‘बेटी बचाओ, बेटी पढाओ‘चा संदेश तू गिर्यारोहणाच्या माध्यमातून राष्ट्रीय स्तरावर पोहोचवत आहेस, ही अभिमानास्पद बाब आहे. ग्रिहीथाच्या उल्लेखनीय कामगिरीची दखल घेत राज्य शासनामार्फत तिला बाल पुरस्कारासाठी सकारात्मक विचार करण्यात येणार असल्याचे मंत्री आदिती तटकरे यांनी सांगितले.
ग्रिहीथा स्नेहा सचिन विचारे हीने अवघ्या ११ व्या वर्षी महाराष्ट्रातील ११० हून अधिक गड-किल्ले, देशातील १८ राज्यांतील ऐतिहासिक दुर्ग तसेच माऊंट एव्हरेस्ट बेस, किलिमंजारो साऊथ आफ्रिका, किनाबालू मलेशीया, बाझारडूझू अझबैजन असे चार आंतरराष्ट्रीय शिखरे सर केली आहेत. वयाच्या सहाव्या वर्षी कुटुंबासमवेत सुरू झालेला तिचा गिर्यारोहणाचा प्रवास आज विक्रमाच्या उंचीवर पोहोचला आहे.
कळसुबाई, भीमाशंकर, अलंग-मदन-कुलंग, गोरखगड, बोरंड्याची नाळ, आधाराई, काळू धबधबा, ढाक भैरी, जीवधन यांसारखे आव्हानात्मक ट्रेक तिने यशस्वीरित्या पूर्ण केले आहेत. सह्याद्रीतील कठीण समजल्या जाणाऱ्या अनेक मोहिमा पार करताना तिने धैर्य, चिकाटी आणि आत्मविश्वासाचे दर्शन घडविले आहे.
संवादादरम्यान ग्रिहीथाने सांगितले की, विविध राज्यांतील गड-दुर्ग सर करताना तिने ‘बेटी बचाओ, बेटी पढाओ’चा संदेश देण्याचा प्रयत्न केला. तिच्या या उपक्रमाचे सर्व स्तरांतून कौतुक होत आहे. लहान वयातच तिने किलीमांजारोसारख्या आंतरराष्ट्रीय शिखराची मोहीम पूर्ण केली असून, एव्हरेस्ट मोहिमेदरम्यान तीव्र थंडी आणि प्रतिकूल हवामानाचा सामना करत जिद्दीने यश संपादन केले. जगातील प्रत्येक खंडातील सर्वोच्च शिखर सर करण्याचे स्वप्नही तिने व्यक्त केले.
०००
