नंदुरबार,दि. २४ :– शासनाच्या आरोग्यविषयक विविध योजनांमधून मदत न मिळालेल्या पात्र व
गरजू रुग्णांसाठी मुख्यमंत्री वैद्यकीय सहायता निधी ‘आधार’ ठरत आहे. नंदुरबार जिल्ह्यात आर्थिक वर्षात
89 रुग्णांना सुमारे 84 लाख 50 हजार रुपयांची वैद्यकीय आर्थिक मदत वितरित करण्यात आली आहे.
मुख्यमंत्री देवेंद्र फडणवीस यांच्या दूरदृष्टीतून जिल्हा कक्षाची स्थापना, पेपरलेस अर्ज
प्रक्रिया, तातडीने अर्जाचा निपटारा करणे आदी सकारात्मक बदल करण्यात आले. त्यासोबतच सामंजस्य
करार, क्राउड फंडिंग आदींच्या माध्यमातून समाजातील मदत करणारे रूग्णालय, धर्मादाय
रूग्णालय, संस्था, दाते आदींच्या सहकार्य लाभत आहे.
मुख्यमंत्री सहायता निधीच्या कार्यपद्धतीत केलेल्या सुधारणा आणि मदतीचे विविध मार्ग उपलब्ध
करून दिल्याने पारदर्शकता वाढून मदत वितरणाचा वेग लक्षणीयरित्या वाढला आहे.
परिणामी, अधिकाधिक पात्र रुग्णांना वेळेत आर्थिक सहाय्य मिळत आहे.
20 गंभीर आजारासाठी मदत
कॉक्लियर इम्प्लांट (वय वर्ष 2 ते 6), हृदय, यकृत, किडनी, फुफ्फुस, बोन मॅरो, हाताचे, गुडघ्याचे
प्रत्यारोपण, हिप रिप्लेसमेंट, कर्करोग शस्त्रक्रिया, रस्ते अपघात, लहान बालकांची शस्रक्रिया, मेंदूचे
आजार, हृदयरोग, डायालिसिस, कर्करोग (केमोथेरपी/ रेडिएशन), अस्थिबंधन, नवजात शिशुंचे आजार, बर्न
(भाजलेले) रुग्ण, विद्युत अपघात रुग्ण अशा एकूण 20 गंभीर आजारांसाठी अर्थसहाय्य दिले जाते.
सामंजस्य करारातून मदतीचा मार्ग मोकळा
मुख्यमंत्री देवेंद्र फडणवीस यांच्या पुढाकाराने मुख्यमंत्री सहायता निधी कक्ष, बीपीसीएल
फाऊंडेशन व टाटा मेमोरियल सेंटर यांच्यात बालकांच्या कर्करोग उपचारासाठी नुकताच सामंजस्य करार
करण्यात आला आहे. या करारामुळे सामाजिक दायित्व (सीएसआर) अंतर्गत उपचारांसाठी विशेष निधी
उपलब्ध होणार आहे. आर्थिक अडचणी कमी होऊन गरजू बालकांना गुणवत्तापूर्ण कर्करोग उपचार सुलभ
होणार आहेत.
आर्थिक वर्षातील मदत
1 एप्रिल 2025 ते 31 मार्च 2026 या कालावधीत राज्यातील तब्बल 40 हजार 776 रुग्णांना
333 कोटी 6 लाख 81 हजार 500 रुपयांची वैद्यकीय मदत देण्यात आली आहे. तर, याच कालावधीत
नंदुरबार जिल्ह्यातील 89 रुग्णांना सुमारे 84 लाख 50 हजार रुपयांची आर्थिक मदत वितरित करण्यात
आली आहे.
नंदुरबार जिल्ह्यातील 89 रुग्णांना सुमारे 84 लाखांहून अधिक मदत मिळाल्याने मुख्यमंत्री वैद्यकीय
सहायता निधीची प्रभावी अंमलबजावणी दिसून येते. मुख्यमंत्री देवेंद्र फडणवीस यांच्या दूरदृष्टीतून सुरू
झालेली पेपरलेस व नवीन कार्यपद्धती, तसेच समाजाच्या सहभागामुळे गरजू रुग्णांना वेळेत उपचारासाठी
आर्थिक आधार मिळत आहे. ही मदत अनेक कुटुंबांसाठी जीवनदायी ठरत आहे. गरजू रूग्णांनी अधिक
माहितीसाठी व सहाय्यासाठी १८०० १२३ २२११ या टोल फ्री क्रमांकावर संपर्क साधावा, असे आवाहन
मुख्यमंत्री सहाय्यता निधी व धर्मादाय रूग्णालय मदत कक्षाचे कक्ष प्रमुख रामेश्वर नाईक यांनी केले आहे.
00000
