• पशू प्रदर्शनाची तयारी अंतिम टप्प्यात; एक हजाराहून अधिक विविध पशू
• बीडसह राज्यातील पशू पालकांनी प्रदर्शनाचा लाभ घेण्याचे आवाहन
मुंबई, दि. ११ : परळी येथे पशुसंवर्धन व पर्यावरण मंत्री पंकजा मुंडे यांच्या पुढाकाराने राष्ट्रीय स्तरावरील महापशुधन एक्स्पो पहिल्यांदाच आयोजित करण्यात आले आहे. या पशू प्रदर्शनाचे उद्घाटन शुक्रवारी १३ फेब्रुवारी रोजी पशुसंवर्धन मंत्री पंकजा मुंडे यांच्या हस्ते होणार आहे. तर, मुख्यमंत्री देवेंद्र फडणवीस हे शनिवार, १४ फेब्रुवारी रोजी पशुधन एक्स्पोला भेट देणार आहेत.
शहरातील वैद्यनाथ महाविद्यालयाच्या समोरील ओपळे मैदानात पशुसंवर्धन विभागाच्या वतीने १३ ते १५ फेब्रुवारी दरम्यान ‘अखिल भारतीय पशुपक्षी महा पशुधन एक्स्पो प्रदर्शनाचे’ भव्य आयोजन करण्यात आले आहे. या प्रदर्शनामध्ये देशभरातील विविध प्रजातींचे एक हजाराहून अधिक पशू पाहण्यास मिळणार असून प्रदर्शनाच्या तयारीला सध्या वेग आला आहे.
मुख्यमंत्री १५ ऐवजी १४ तारखेला परळीत
मुख्यमंत्री देवेंद्र फडणवीस प्रदर्शनाच्या समारोपाला म्हणजे रविवारी १५ तारखेला येणार होते, परंतु ते आता शनिवार १४ फेब्रुवारी रोजी सकाळी ११ वा. येणार आहेत.
पशुप्रदर्शन ऐतिहासिक
या प्रदर्शनात पशुपालकांना गायी, म्हशी, घोडे, शेळ्या-मेंढ्या आणि विविध पक्ष्यांच्या दर्जेदार प्रजाती पाहायला मिळणार आहेत. केवळ महाराष्ट्रच नव्हे, तर संपूर्ण देशातील प्रगतशील पशुपालक व शेतकरी या ठिकाणी हजेरी लावणार आहेत. पशुपालकांना आधुनिक पशुपालन, आहार व्यवस्थापन आणि आरोग्याविषयी सविस्तर माहिती या माध्यमातून मिळणार आहे. पशुसंवर्धन विभागाच्या वतीने पशुसंवर्धन मंत्री पंकजा मुंडे यांच्या मार्गदर्शनाखाली या प्रदर्शनाचे नियोजन अत्यंत प्रभावीपणे करण्यात येत आहे. परळी वैजनाथ येथे प्रदर्शनासाठी भव्य मैदान व पशुधनासाठी आवश्यक सुविधा उभारण्याचे काम सध्या अंतिम टप्प्यात आले आहे.
हा अत्यंत सुंदर योगायोग
महाशिवरात्र आणि महापशुधन एक्सपो हा अत्यंत सुंदर योगायोग आहे. परळीत असे प्रदर्शन व्हावे, अशी माझी इच्छा होती. नवीन तंत्रज्ञान व दर्जेदार पशुधनाची माहिती घेण्यासाठी हे प्रदर्शन एक महत्त्वपूर्ण व्यासपीठ ठरणार आहे. बीड जिल्ह्यासह राज्यातील जास्तीत जास्त पशुपालकांनी या तीन दिवसीय प्रदर्शनाचा लाभ घ्यावा, असे आवाहन मंत्री मुंडे यांनी केले आहे.
०००
नंदकुमार वाघमारे/विसंअ
