सांगली, दि. 1 : पद्मभूषण डॉ. वसंतदादा पाटील हे एक विद्यापीठ होते. त्यांचे विचार आजच्या काळातही नव्या पिढीला मार्गदर्शक आहेत, असे प्रतिपादन जिल्ह्याचे पालकमंत्री चंद्रकांत पाटील यांनी आज येथे केले.
राज्याचे माजी मुख्यमंत्री पद्मभूषण दिवंगत डॉ. वसंतरावदादा पाटील यांच्या स्मृतिदिनानिमित्त त्यांच्या स्मृतिस्थळी आयोजित अभिवादन सभेत ते बोलत होते. यावेळी खासदार विशाल पाटील, माजी केंद्रीय राज्य मंत्री प्रतीक पाटील, जिल्हाधिकारी अशोक काकडे, शैलजा पाटील, जयश्री पाटील यांच्यासह शासकीय अधिकारी, पाटील कुटुंबिय आदि उपस्थित होते.
माजी मुख्यमंत्री पद्मभूषण दिवंगत डॉ. वसंतदादा पाटील यांच्या कार्याला अभिवादन करून त्यांच्या कार्याला उजाळा देताना पालकमंत्री चंद्रकांत पाटील म्हणाले, पद्मभूषण डॉ. वसंतरावदादा पाटील यांनी देशाच्या स्वातंत्र्य चळवळीत क्रांतिकारक म्हणून योगदान दिले. स्वातंत्र्यप्राप्तीनंतर राजकीय भूमिकेत आल्यानंतरही त्यांनी आपली तत्वे, मूल्ये जपली. ते सर्वसामान्य माणसाला आपले करणारे नेतृत्व होते. वर्षानुवर्षे ज्यांच्या स्मृती पुसल्या गेल्या नाहीत, असे वसंतदादा यांचे नेतृत्व होते. शिक्षणासाठी दक्षिणेला जाणारा ओढा त्यांनी विनाअनुदानित महाविद्यालये सुरू केल्याने थांबला. आजही राजकारणात त्यांचे अनेक दाखले दिले जातात, असे त्यांनी सांगितले.
प्रारंभी पालकमंत्री चंद्रकांत पाटील यांनी पद्मभूषण दिवंगत डॉ. वसंतदादा पाटील यांच्या समाधिस्थळी पुष्पहार अर्पण करून आदरांजली वाहिली.
000
